✒️د.بولا وجيه
كل اختيار بنختاره في حياتنا، بيبدأ بفكرة صغيرة بتتكون جوانا، زي بذرة صغيرة بتتحط في الأرض. الفكرة دي بتحتاج لرعاية، ومصدرها الأساسي هو القلب اللي بنسمع منه. بس هل كل البذور اللي بنزرعها في حياتنا بتنبت ثمار كويسة؟
القلب اللي مليان بربنا هو زي أرض خصبة، مستعدة تستقبل البذور وتنبت ثمار مليانة حياة وسلام. لكن لو القلب بعيد عن ربنا، الأفكار اللي هتخرج منه ممكن تكون مليانة قلق، خوف، أو حتى كبرياء.
علشان كده، مهم جداً إننا نكون دايماً فاهمين إن القلب مش بس مصدر للأفكار، لكنه كمان مؤشر على حال روحنا. لو حسيت إن قراراتك مضطربة أو أفكارك مش في مكانها الصح، اسأل نفسك: هل قلبي قريب من ربنا؟ هل أنا سايب ربنا يوجهني؟
كل ما قلبك يكون مليان بمحبة الله وكلمته، هتلاقي نفسك بتفكر بطريقة مختلفة. أفكارك هتكون مليانة نور، وحتى قراراتك هتكون وراها سلام داخلي. زي ما مكتوب: "يَا ابْنِي، أَعْطِنِي قَلْبَكَ، وَلْتُلاَحِظْ عَيْنَاكَ طُرُقِي" (أمثال 23:26).
ابدأ النهارده، وخلي قلبك مكان مريح لربنا يسكن فيه، علشان أفكارك تكون دايماً مليانة حياة وأمل.