التفكير القهري: عندما يصبح العقل سجنًا

د.بولا وجيه

هل حسيت  في يوم إنك مش قادر توقف أفكارك؟

إنك طول الوقت بتفكر في نفس الموقف، نفس الكلام اللي قلته أو ما قلتوش، أو حتى في سيناريوهات ممكن تحصل وما حصلتش لسه؟

أهلا بيك في عالم التفكير القهري…

عقلك زي آلة تشتغل 24 ساعة بدون توقف، وأنت واقف تتفرج، مش عارف توقف الزرار.

💡 ليه بيحصل كده؟

التفكير القهري مش ضعف منك ولا علامة إنك "شخص زيادة عن اللزوم"، بالعكس، ده بيحصل مع ناس حساسة، بتحب تعمل الصح، وبتخاف تزعل حد أو تغلط… بس العقل بيتحول لدوامة!

• ممكن يكون بسبب قلق مزمن.
• أو تجارب صعبة اتعلمت منها إنك لازم تكون دايمًا مستعد.
• أو حتى طبع عندك بيحب المثالية، وعايز تلاقي "الرد المثالي" أو "التصرف المثالي".

لكن المشكلة إن التفكير مش بيجيب حل… بالعكس، بيسحبك أكتر للقلق والتعب.

🛡️ تعمل إيه؟

✅ أول خطوة: لاحظ نفسك. لما تلاقي الأفكار بتجري جوا دماغك، قول لنفسك: "آه… دي دوامة التفكير شغالة تاني."

✅ خليك واعي: الأفكار دي مش أنت. هي مجرد ضيوف في عقلك… مش لازم تصدقهم ولا تتبعهم.

✅ خصص وقت للتفكير: مثلًا، كل يوم ربع ساعة الصبح، اقعد وفكر بعمق… بعدين، طول اليوم، لو الأفكار رجعت، قول لنفسك: "مش دلوقتي".

✅ اشغل نفسك: رياضة، قراءة، هواية… أي حاجة تشغل عقلك بدل ما يلف في نفس الدايرة.

✅ لو حسيت إنك مش قادر تتعامل لوحدك، الجلسات النفسية بتكون فعالة جدًا في علاج التفكير القهري.

🌼 أنت مش أفكارك… أنت أكبر وأعمق من كده بكتير.